فوائد و أضرار عمل قناة يوتيوب لمشاركة المعرفة
ليه عملت قناة يوتيوب عن البرمجة والذكاء الإصطناعي؟
الأسباب كانت كثيره بس أذكر منها:
- زهقان ومعنديش شغل في الوقت الحالي
- المقالات الي بكتبها بتكون باللغة الإنجيليزية ومحسنة كثير باستخدام AI فمش بتكون أفضل جودة
- الفيديوهات أكثر إنتشار من المقالات في الوقت الحالي
- الفيديو بيخليك تشرح بشكل أعمق من مجرد الكتابة وتسلسل الأفكار في دماغك بيكون أقوي فده بيخليني احضر بشكل احسن واثبت المعلومة أكثر.
- علشان أشهر نفسي أكثر بحيث ده يساعدني الاقي فرص شغل اكثر بحيث احقق دخلي محترم واقدر اكمل باقي حياتي من غير صعوبة العثور علي وظيفة بالطرق التقليدية
بداية القناة؟
بدات بداية بسيطة من غير مونتاج اسكرين ريكورد سريع السلام انا كذا والمشكلة الي بحلها هي كذا وبشرح الفيديو و بنهي بس كده وارفعه وخلاص.
نزلت اول فيديو عن تطبيق إدارة مهام بستخدمه علشان اخلي حاجز البداية بسيط. بعدين نزلت 2 فيديو عن أوراق بحثية في مجال تخصصي.
والحقيقة ان إحتفاء الناس كان اكثر بكثير من المقالات والمتابعة والإشتراك كان مميز وكويس عن الطبيعي.
فشكرا لكل حد اهتم وشايف ان الي بقدمه مفيد.
مخاطر التواجد الرقمي و شهوة الأرقام!
من مخاطر التواجد المستمر علي السوشيال ميديا زي لنكدان ويوتويب ومراقبة أرقام بتاعتك من زيارات ومشاهدات بتخليك منغمس في المتابعة وطاقة بتستهلك واحده واحده.
التشتت بيزيد وده بيبعدك عن هدف الأساسي وهو التعلم ومشاركة المعرفة.
بتبدا أفكار تجيلك انك تحاول تزود من المحتوي الي بيعجب الناس والي هو بيكون مش هدفك الاساسي ولا ذو قيمة ونفع عالي الجودة زي الي انت نفسك تحب تستهلكه.
فوائد القناة
- اتكلمت مع ناس كثيره وحد فهم عرض عليا شغل اعمله.
- اتعرفت بشكل احسن وبدات ابني لنفسي تواجد رقمي مميز والناس بدات تعرفني في الجانب الي احب انهم يعرفوني فيه.
- فهمت مفاهيم رياضية بشكل اعمق وانا بحاول ابسطها للناس بشكل متخيلتش اني افهمه والمعلومات محفوظة عندي لمدة اطول وبترابط كويس يخليني ابدا افهم مواضيع اعمق.
- توليد إحساس مستمر بالإنجاز ده انا قدرت اشرح كذا يبقي اقدر شرح غيره وهكذا ده بيولد نجاحات متتابعة.
الهدف المستقبلي؟!
اكيد من أهدافي اني الاقي الأرقام بتعلي بس الاهم انها بتعلي من الناس الي تقدر المحتوي وتلاقيني بفيدها واكون فعلا بقدم قيمة حقيقة ذات معني تلهمني وتلهم الأخرين وتسهل عليهم رحلة التعلم بتاعتهم.
هحاول اشرح محتوي اعمق من حيث الأبحاث والكتب.
مش مهتم الحقيقة برقم معين..المهم بجودة الي اقدره اصنعه
اتمني اني اكمل من غير إنحراف عن الوجهة الرئيسية.
ممكن تحس إني بدي الأمور اكثر من حقها لكن في الحقيقة : الامر مهم وبيفرق كثير علي المستوي البعيد وده ملاحظ في الناس الي بدات ونهاية بالنسبة لي كانت مؤسفه.
المحتوي اتحول لسطحية وإستهلاكيه عالية بلا قيمة، زي الأكل سريع التحضير حلو الطعم قليل الفائدة.
دي اول مقالة اكتبها باللغة العربية مع بعض العامية بسبب حاجز اللغة عندي في العربي والإنجيليزي لكن تجربة الكتابة نفسها اكثر متعة من الكتابة بالإنجيليزية ومفيش إستخدام للنماذج اللغوية لان مفيش داعي!